Сӗнтӗрвӑрри округӗнче ҫӑлавҫӑсем пӑр ҫинчи икӗ пулӑҫа ҫӑлнӑ. Ку пуш уйӑхӗн 22-мӗшӗнче пулнӑ.
Вӗсем пулӑ тытма ларнӑ кӑна – пӑр катӑлса шыва май ишме пуҫланӑ. Арҫынсем ҫыран хӗррине хӑйсем тӗллӗн тухайман, ҫӑлавҫӑсем патне шӑнкӑравланӑ. Специалистсем вӗсем патне кимӗпе ҫитсе пулӑшнӑ.
Ҫӑлавҫӑсем хальхи вӑхӑтра пӑр ҫӳхе пулни пирки асӑрхаттараҫҫӗ. Ытларах ҫыран хӗрринче, юханшывсем пӗрлешнӗ вырӑнта.
Пуш уйӑхӗн 1-мӗшӗнчи мониторинг кӑтартнӑ тӑрӑх, халӑхран 1 литр сӗте 22,6 тенкӗпе пуҫтараҫҫӗ. Пӗлтӗр ку вӑхӑтра хак 22,4 тенкӗпе танлашнӑ. Апла сӗт хакӗ 20 пус ӳснӗ.
Пӗлтӗр пуш уйӑхӗнче Раҫҫейӗпех халӑхран пухакан сӗт хакӗ чакнӑ. Ҫакна санкцисем пулнипе, суту-илӳре сӗт юр-варӗ нумайланнипе, халӑх сӗт-турӑх таврашне сахалрах туянма пуҫланипе сӑлтавланӑ. Кайран вара ҫулла ҫитнӗ - ӗнесем симӗс курӑк ҫине тухса сӗт ытларах антарма тытӑннӑ. Ҫакна пула та хак чакнӑ.
Хальхи вӑхӑтра Элӗк, Комсомольски, Сӗнтӗрвӑрри округӗсенче сӗтшӗн ытларах тӳлеҫҫӗ - 1 литршӑн 26 тенкӗ таран. Чи пӗчӗк хаксем - Йӗпреҫ, Пӑрачкав, Шӑмӑршӑ, Вӑрмар округӗсенче: унта пӗр литр сӗте 19 тенкӗрен пуҫласа 21 тенкӗ таран хакпа туянаҫҫӗ.
Нарӑс уйӑхӗн 23-мӗшӗнче Тӑван ҫӗршыв хӳтӗлевҫин кунӗнче, ҫул-йӗр инспекторӗсем 12 ӳсӗр водителе чарнӑ. Вӗсенчен пӗри - Сӗнтӗрвӑрри муниципаллӑ округӗнче.
Хайхискер юрҫӳренпе пынӑ. Тӗттӗмре фарӑсене те ҫутман. Ӑна чарсан водитель ӳсӗр пулни палӑрнӑ. Унӑн водитель прави те, транспорта регистрациленине ӗнентерекен документ та пулман.
Водитель тӗлӗшпе административлӑ ӗҫсем пуҫарнӑ. Юрҫӳрене вара хураллакан ятарлӑ стоянкӑна ӑсатнӑ.
Пирӗн республикӑра Чапаевпа Николаев ячӗллӗ суйлав участокӗсем туса хунӑ. Ҫын ячӗпе хисепленекеннисем — пурӗ пилӗк участок. Ҫапла тума муниципалитетсен пуҫлӑхӗсем ыйтнӑ-мӗн.
Шупашкарти 1937-мӗш номерлӗ участок малашне Граждан вӑрҫин паттӑрӗн, Шупашкарта ҫуралнӑ Василий Чапаев ячӗпе хисепленет, Сӗнтӗрвӑрри муниципаллӑ округӗнчи Шуршӑлти 1130-мӗш округ — икӗ хут СССР Геройӗн Андриян Николаев ячӗпе.
Тата тепӗр виҫӗ участока ятарлӑ ҫар операцийӗнче пуҫ хунисен ятне панӑ. Улатӑр тӑрӑхӗнчи 117-мӗш участока Александр Старчков ячӗллӗ, Шупашкар тӑрӑхӗнчи 1744-мӗш участок — Дмитрий Семенов ячӗллӗ, Елчӗк тӑрӑхӗнчи 2402-мӗш участок — Николай Петров ячӗллӗ.
Кашни участокрах ятарлӑ стендсем йӗркеленӗ.
Чӑваш Енри прокурорсем хӑйсен ӗҫтешне Зелфинас Карамана тава тивӗҫлӗ канӑва ӑсатнӑ.
Карама прокуратура тытӑмӗнче 1983 ҫултанпа тӑрӑшнӑ. Юлашки ҫулсенче вӑл Шупашкар районӗн прокурорӗ пулнӑ. Надзор органӗнче 40 ҫул ытла тимленӗ 65 ҫулти прокурора тава тивӗҫлӗ канӑва савӑнӑҫлӑ лару-тӑрура ӑсатнӑ.
Сӑмах май каласан, унӑн ывӑлӗ Ленар Карама Сӗнтӗрвӑрри районӗнчи прокуратурӑна 2021 ҫултанпа ертсе пырать.
Сӗнтӗрвӑрри муниципаллӑ округӗнче нарколаборатори йӗркеленӗ 32 ҫулти арҫынна суд тунӑ. Ӑна ҫирӗп режимлӑ колоние 7 ҫул ҫурӑлӑха ӑсатма йышӑннӑ, укҫине патшалӑх валли туртса илнӗ.
Вӑл, Мускав арҫынни, пӗлтӗр харпӑр ҫуртра лаборатори йӗркеленӗ. Йӗрке хуралҫисем пӳрте ухтарсан хими оборудованине, наркотик туса кӑлармалли прекурсорсене туртса илнӗ. Ҫавӑн пекех 8 килограмм ытла наркотик тупнӑ. Ку кӑна мар, арҫын наркотик сутса тупӑш тунӑ 1 миллион тенкӗ те йӗрке хуралҫисен куҫӗ тӗлне пулнӑ.
Кӑҫалхи авӑн уйӑхӗн 5-мӗшӗнче чӑваш ҫӗрӗн мухтавлӑ ывӑлӗ, тӗнчери виҫҫӗмӗш космонавт, Совет Союзӗн икӗ хут Геройӗ, авиацин генерал-майорӗ Андриян Николаев ҫуралнӑранпа 95 ҫул ҫитет. Паллӑ куна халалласа республикӑра тата космонавт ҫуралнӑ ялта, Шуршӑлта,тӗрлӗ мероприяти иртӗ.
Чӑваш академи драма театрӗ «Эп – Кӑйкӑр!» спектакль хатӗрлет. Ӑна калмӑк режиссёрӗ, Раҫҫейӗн искусствӑсен тава тивӗҫлӗ ӗҫченӗ Борис Манджиев хатӗрлет. Вӑл тата театрӑн артисчӗсем СССР лётчик-космонавчӗн А.Г. Николаевӑн мемориал комплексӗнче пулнӑ.
Спектакле ака уйӑхӗн 5-мӗшӗнче кӑтартӗҫ.
Шупашкарти 7-мӗш типографи «Сӗнтӗрварри районӗн энциклопедине» пичетлесе каларнӑ. Сумлӑ кӗнекене 2 пин ытла статьяпа сӑнӳкерчӗк вырнаҫтарнӑ. Вӗсем ку тӑрӑхӑн аваллӑхне 18-мӗш ӗмӗртен пуҫласа паянхи кун таранччен уҫса параҫҫӗ. Ҫавӑн пекех кӗнекере хӑйсен ырӑ ӗҫӗсемпе халӑх асне кӗрсе юлнӑ ҫынсен тата паянхи хастарсен кун-ҫулне ҫырса кӑтартнӑ.
Энциклопедине хатӗрлеме район администраципе «Сӗнтӗр Ен» ентешлӗх пуҫарнипе пилӗк ҫул каялла тытӑннӑ. Ҫак ӗҫе ял хутлӑхӗсенче ӗҫлекенсене, депутатсене, таврапӗлӳҫӗсене, культура ӗҫченӗсемпе учительсене, библиотекарьсене, ӗҫ ветеранӗсене явӑҫтарнӑ. Пӗтӗм ӗҫе Сентӗрвӑрри муниципаллӑ округӗн тӗп библиотека системи йӗркелесе пынӑ.
Район энциклопедине халӑхран пуҫтарнӑ укҫа-тенкӗпе пичетлесе кӑларнӑ. Ӑна С.Ю. Михайлова тата Т.Г. Борзунина пухса хатӗрленӗ, редакторӗ В.Н. Алексеев.
Сӗнтӗрвӑрри муниципаллӑ округӗнчи Сӗнтӗрпуҫ ялӗнче ҫынсем виҫҫӗмӗш кун ӗнтӗ шывсӑр пурӑнаҫҫӗ. Кӑрлач уйӑхӗн 19-мӗшӗнче шыв башни шӑнса ларнӑ. Кун пирки «Про Город» хаҫата халӑх корреспонденчӗ пӗлтернӗ.
Ҫынсем пулӑшу ыйтнӑ, анчах ку вӗсен ыйтӑвӗ мар тесе пулӑшма хирӗҫленӗ - ҫынсен башньӑра шӑнса ларнӑ шыва хӑйсен ирӗлтермелле тенӗ. Паян халӑх ку ӗҫе хӑйех пуҫӑннӑ.
Башня ӗҫлеменнипе ҫынсен ҫӑла шыв ӑсма кайма тивнӗ. Анчах ҫил-тӑманра унта ҫула хӳсе лартнӑ. Йӗлтӗр сырса каякансем те пулнӑ.
Чӑваш Енӗн Культура министерстви Андриян Николаев ҫуралнӑранпа 95 ҫул ҫитнине халалласа килес ҫул туса ирттермелли ӗҫсен планне ҫирӗплетнӗ.
Сӗнтӗрвӑрри муниципаллӑ округӗнчи Шуршӑлти мемориал комплексӗнче самай мероприяти иртӗ. Ҫав шутра ача-пӑча ӳкерчӗкӗсен конкурсӗ пулӗ, куравсем уҫӑлӗҫ,
Чӑваш патшалӑх академи драма театрӗ «Андриян Николаев» спектакль лартма хатӗрленет. Шупашкарти Симфони капелли куракансене ҫӗнӗ концерт программипе савӑнтарӗ.
+6.3 °C